Hike出香港系列 - 關島Guam (下集) 有片睇！

上集講到去關島行山，已經發生左好多超神奇嘅事，跟住落嚟係更加精彩......


除左好正嘅團友之外，其實仲有隻狗狗同我哋一齊行山，每次我哋喺好窄嘅山路行緊時，狗狗就會喺我哋中間穿嚟穿去，點都要爬你頭，然後佢個身就會同我哋對腳有親密接觸，加埋條尾擺下擺下，真係好得意呀😍🐕

影相望呢度🐶

其實由一開始行嘅時候，已經留意到有一位領隊年紀比較大，樣似80歲左右，裝束有啲似侏羅紀公園入面嘅研究員，呢位伯伯原來係同我哋一齊行，不過佢會下路，即係唔駛上山頂兜路一樣可以到目的地，如果體力唔夠嘅朋友可以選擇跟伯伯行。

大約12點半左右，我哋去到一個山頂嘅平地度休息兼食午餐，拎出朝早買嘅日式飯糰食，唔知係咪太攰同肚餓，覺得個飯糰真係超！級！好！食！

食飽飽之後又係影相時間，綠油油嘅山巒一望無際，加埋個藍到一個點嘅天空，唔識形容，自已睇👇

休息時，Alan指住一個勁遙遠嘅風車同我哋講，我哋要行到去嗰度，就差唔多到終點啦，目測個風車得粒芝麻咁大，我同蠶寶都只可以苦笑😳

大約休息左半個鐘之後，繼續起行，但係我哋掛住影相，遲左出發，一開始就緊唔貼大隊，不過都仲見到隊尾，直到一段落山坡嘅路，啲草開始變長，因為睇唔到地下，於是低頭望實個地咁行，行行下再抬頭……OMG💀 人呢？又唔見晒嘅？

雖然個心好淆底，咁硬住頭皮都要行架啦，只係行行下，身邊啲草突然變到好長，個地好深，深到叉晒成隻腳落去到掂唔到，就知道瀨野了。我哋曾經嘗試爬返上去(記得嗰度好斜好斜)，但係折返失敗，困左喺雜草亂樹堆之間，啲草多到同深到可以托起兩個人！我哋兩個就咁雙腳叉左入草堆(腳掂唔到地)，不知所措……

無計可施之下，真係幾樣衰都要做架啦，於是我哋諗辦法企高，揮動手上有顏色嘅物件，向山下嘅團友求救，只記得我好鬼大聲咁叫Help🙈 叫左一陣之後，似乎有人見到，Alan同另一個領隊返轉頭上山搵我哋嘅位置。

大約10分鐘後，終於確認左我哋位置，聽到佢哋把聲喺左邊傳過嚟，而且好近，只不過俾啲草牆遮住晒，只聽其聲不見其人，我哋兩個都好努力咁爬過去，好小心咁坐喺草上面慢慢瀡 過去。

其實我哋同Alan相距應該唔夠5米，不過都用左10-15分鐘先爬出草堆，我諗山下面嘅團友應該等左好耐，所以好有壓力，想快啲落到去，不過落山條路有好多好多草，如果踩喺上面係會好跣架，於是Alan就教我地瀡草落山，開頭都淆淆底，不過後面就越瀡越快，仲覺得好好玩！好似細細個去公園玩瀡滑梯嘅感覺！

喺關島行山，絕對要做足全副防曬裝備，因為太陽唔會手下留情，落左一個山頭之後，大隊繼續攀過一個又一個山頭，呢個時候我已經feel到自己放晒電，全身發燙，嗱嗱臨除左外套散熱，唔係中暑都似，內心只有好想好想好想停低休息下。

呢個時候其實身體已經負左能量，堅想放棄(其實都無得放棄😂)，突然聽到有個領隊幫大家加油打氣，聽到一句「You can slow down but never stop」。無錯！就算幾慢都好，只要唔停低，總會到達終點。就係呢句說話，令我攞出前所未有嘅意志力出嚟繼續行！

唔知俾個太陽乾煎左幾耐之後，終於一口氣攻上最後一個小山頂，踏上去嗰下真係覺得好有成就感，因為又再一次戰勝左自己。

休息左一陣就繼續起行，其實喺呢一刻，手手腳腳完全唔係屬於我，仲一路都以為好快就到，行完先知原來過左小山頂之後，都行左個幾鐘先到終點……總算呃到自己行埋落去，期間一直上斜落斜，又keep住曬太陽，好彩都落左一陣過雲雨，溫度降低左好多，未試過咁中意落雨。

唔經唔覺行到去Trazan falls啦，我哋係行經瀑布上面，所以要再爬落去瀑布底，大家見到水都超級興奮，急不及待跳落水降降溫，而我實在攰到唔想郁啦(加上唔識游水)，剩係坐左喺度休息，無落瀑布浸水，後來先知原來下面好靚(後悔……)

前面下面係瀑布底

叉完電之後，我哋就向終點進發啦！由Trazan falls行去終點大約半小時，唔太辛苦，沿途仲見到好多人行去Trazan falls，我估呢度應該係關島一個幾熱門嘅行山點。

最後過埋風車發電站(之前喺山頂見到得芝麻咁大粒嗰個)，終於都到啦！好感動好感動好感動呀！最令人驚喜嘅係，領隊仲準備左超冰凍嘅Lemonade俾大家飲(唔知係咪次次都有)，喺好攰時再飲一啖凍嘅野，蠶寶彈左句<呢杯係世界上最好飲嘅野啊！> ❤

飲緊「世界上最好飲嘅野」 (PS 啲果汁係用自己水樽裝架)

休息緊嘅時候，見到架空電纜有好多鞋掛左上去，Alan話有好多人征服左呢個路段，會拋對鞋上去，係完成壯舉嘅象徵標誌，可惜我無多對鞋，如果唔係都可以留下印記😂👟

行完山之後，Alan仲車我地去Agana shopping center(民宿附近)，返市區嗰程車都成40分鐘，先知原來行左咁遠啊！Alan話今次行程比較悶，有時會行沙灘入叢林，有機會一定要再嚟體驗下Guam style hiking咁話啊！

後記：(一) 返到民宿之後，兩條友仔已放電，拿拿臨沖完涼就瞓左，嗰時係夜晚7點左右，然後兩人唔駛1秒進入熟睡狀態，瞓足12個鐘先起身！未試過瞓得咁好lor😂

(二) 想去關島行山嘅話，由於UA直飛關島嘅飛機只得星期一、三、五、六夜機，我哋選擇左星期五去星期一返。如果唔想好似我哋咁chur，可以搭星期三晚飛機，星期四同五可以去下觀光，星期六去行山，預返大約3點左右結束，可以搵個地方簡單洗個面換件衫(例如DFS)，之後就可以搭6點機返香港啦！


影片：



~完~


Kana's 關島遊記將會持續更新....多謝收睇！