Hike出香港系列 - 關島 Guam(上集)
日期：2017年
地點：Mt. Tenjo (黃點) & Trazan falls (藍點) @Guam
時間：9:00am-4:00pm
裝備：手套，水(約每人 2L)，午餐，Vitamin water 1支(500ml)
今次喺我哋第一次行山行出香港，首站--美國關島。因緣際會之下，認識左關島呢個地方，第一次去已經愛上左呢個地方，中意行山嘅我點都要喺關島嘅山留返啲腳毛！
因為今次係3日2夜嘅極速之旅，星期五晚收工之後即刻衝入機場，搭晚上10點55分嘅飛機，直飛關島。第二日朝早5點到埗後，就放底行李去行山啦！咁大個女都未試過咁熱血😂
而家要由香港直飛關島，搭UA聯合航空，今次張機票買左每人約$2245(連稅)，有飛機餐同每程可託運2件23kg行李，計落個人覺得唔算太貴。因為機程只有4個半鐘，又要食宵夜(飛機餐)😂，所以小睡左一陣就到啦，關島比香港快兩個鐘，去到已經係當地時間5點半左右，半夢半醒咁過關，拎Wifi 蛋，步出機場嘅時候大約6點，岩岩好天光，清晨嘅關島好舒服好靚！
 |
| 清晨的關島 |
喺民宿整頓左行李之後，因為未夠鐘於是瞓返半粒鐘，就出發去行山啦！啱啱先落機，人又未清醒，加上今次行程大約5-6個鐘，屬中等難度，所以我將佢視為超級大挑戰，但係無野可以阻止到我哋行山嘅熱血架💪
其實喺香港上飛機發生左一段小插曲，話說因為星期五晚收工趕住衝入機場，結果check in 時先發現對行山鞋漏左喺公司，蠶寶二話不說就借左佢對行山鞋比我，自己就著對普通波鞋，實在太感動啦😫 多謝妳呀蠶寶！！！
今次跟左個當地嘅行山團Boonie stomper 行山，由一班資深嘅行山人士帶領，每個星期六早上都會有行山團出發(其他日子肯肯定係無團嘅！)因為佢哋係非牟利團體，領隊都係義工帶隊。如果真係星期六去唔到咁就無辦法啦，其他日子想行山唯有搵返當地旅行社跟團啦。
佢哋每個月會喺 Facebook update 嚟緊會行嘅行程路線資料
有時星期六夜晚都會有夜山團，最新嘅時間表可以睇返呢度👉 http://www.facebook.com/GuamBoonieStompersInc/
出發去集合之前，請朋友帶我哋去便利店買水同食物，因為午餐會喺山上食，我哋買左兩支大水，一支維他命水(搵唔到能量飲品……)，買左個三文治同兩個原條壽司卷，買左大約港幣100蚊左右。跟住再幾分鐘車程，就到左查莫洛文化村主大樓(Chamorro Village Building) 等夠鐘集合。
 |
| 行山集合地點：查莫洛文化村主大樓 （Sources：Pacific Daily News） |
星期六早上9點正，團體就會喺查莫洛文化村(Chamorro Village)集合，登記同繳費後(費用是每人2美金)，會有一個10分鐘嘅briefing，領隊會講解一下當日嘅流程，起點同終點喺邊，會行經咩地方，亦都會統計下有咩人係無車要坐領隊順風車(因為起點距離集合點唔近，要再開車過去)，我哋無車所以係要痴車坐嘅。
呢日加埋我哋兩個大約有15人左右，其中3位係領隊，其他都係外國人，望落大家身型好似好fit好好體能咁，當下真係有少少淆底，好驚對腳唔夠長，跟唔上大家嘅步伐，同埋蠶寶未瞓醒心情唔係幾好....
就喺我哋好專心聽緊briefing嘅時候，耳仔傳嚟一啲好熟悉嘅語言，無錯！係廣東話！明明呢度係關島，大家都講英文，點解會有廣東話呢？跟住就有位男士行左過嚟打招呼，佢問我哋係咪澳門人(因為我件衫上面有印住澳門香港呢幾個中文字，不過香港兩個字喺另一邊，佢睇唔到😆)。
我哋就話我哋係香港嚟架，佢叫話佢都係香港人，叫Alan，好耐之前移民過嚟關島定居，每個星期六都會嚟join呢個團行山，佢仲有幾個香港朋友一齊行，歡迎我哋咁話。其實當時我好開心架，因為喺外地遇到同鄉嘅感覺好特別，而且佢仲叫我哋跟佢車去出發點，今次真係出門遇貴人。
 |
| 出發點 |
Alan話放低左我哋之後，要將架車駛去終點處，再返嚟一齊出發，咁我哋同埋部分團友就喺度等佢哋返嚟。呢度個景真心靚，影相梗係指定動作，點解關島個海可以咁藍架？滿足左對眼之後，就搵左個樹蔭坐低休息，望住藍藍的天空，綠油油的草地，好似頓時咩煩惱都無晒，喜愛關島指數急升😍
 |
| 關島真係好靚！ |
正當兩條友發緊白日夢嘅時候，突然有人伸出一杯野俾我哋，原來其中一個領隊準備左冰水俾大家消暑，仲好貼心咁俾埋杯大家，喺成三十幾度戶外環境之下，飲到一杯冰水，真係覺得好幸福！
唔知過左幾耐(我諗20-30分鐘左右)，終於全員到齊，出發啦！不過一開始就改左路線，因為領隊話原定路線附近有人打獵(現場真係間唔中聽到有槍聲架)，為左團員安全著想，改行其他路線，所以都建議大家嚟關島行山，最好搵專業領隊帶路，安全至上呀！
相比起香港嘅山路，關島嘅山路Wild好多，唔會有樓梯唔會有明顯山徑(不過我諗外國地方嘅山路應該都係咁wild，係香港先有咁多<完整>嘅山路…)，所以要跟隊跟貼啲，如果唔係好易會跟甩隊…
 |
| 出發了！ |
因為本身出發點已經喺山上面，所以整體高低起伏唔算大，反而係大部分路段都好曬(香港雞公嶺啲朋友)，曬住咁行體力消耗得非常快，對於呢兩條前一晚休息唔夠嘅友仔嚟講，簡直係雪上加霜
開頭路段俾人感覺都幾荒蕪，又鬼死咁曬，好彩唔係行左好耐(20分鐘左右)，就上左一個小山頭吹風，呢度啲風真係大到<發發>聲，有幾次差啲要同我頂帽講Bye Bye啦👋👋
 |
| 睇下啲頭髮咁飄逸就知幾大風 |
本身自己怕曬所以有著薄身長袖外套，估唔到竟然都頂到啲草牆嘅攻擊，可憐剩係著背心嘅蠶寶，對纖纖手臂早已經俾啲草𠝹到花晒，夜晚沖涼實正到high high聲。
長草路由平地伸延到山脊，成段山脊路都係長草，雖然比起啱啱啲草牆已經短左好多，之但係啲草完全庶住左個地面，你唔會知道自己踩唔踩到地下，而且草下面嘅地時不時有洞，有幾下都叉錯腳，嚇到心都離一離，真係一步一驚心啊！
正當我專心咁低頭行緊嘅時候，抬頭一望，咦？人呢？於是加快腳步，希望跟返上前面嘅人，終於見到前面有個外國女仔，咁就梗係跟實佢行啦！
去到有個位要落山，我仍然跟住個女仔落，點知越行越唔對唔，無端端入左去啲勁多樹根同長草嘅路，但眼見其他人已經山坡下嘅團友，同我哋距離似乎唔係好遠，無辦法都要繼續鏟落去，沿途我哋彼此打氣，十分鐘之後終於鏟出草林，我哋興奮到即刻give me five！喺呢一刻突然覺得人同人之間嘅關係真係好微妙，當大家有共同嘅目標，就會變成共同體，互相扶持去完成佢。
待續……
正當我專心咁低頭行緊嘅時候，抬頭一望，咦？人呢？於是加快腳步，希望跟返上前面嘅人，終於見到前面有個外國女仔，咁就梗係跟實佢行啦！
去到有個位要落山，我仍然跟住個女仔落，點知越行越唔對唔，無端端入左去啲勁多樹根同長草嘅路，但眼見其他人已經山坡下嘅團友，同我哋距離似乎唔係好遠，無辦法都要繼續鏟落去，沿途我哋彼此打氣，十分鐘之後終於鏟出草林，我哋興奮到即刻give me five！喺呢一刻突然覺得人同人之間嘅關係真係好微妙，當大家有共同嘅目標，就會變成共同體，互相扶持去完成佢。
待續……
留言
張貼留言