荒山girl2017第一炮 之 爬到隻狗咁嘅狗牙嶺
 |
| 攝於2017.1.8 「一線生機」上 |
日期：2017.1.8
人物：荒山girl 三人組
出發時間：
11:00am石壁水塘出發-->西狗牙-->一線生機-->斬柴坳-->心經簡林-->6:30pm到達昂坪
交通：
起點 (東涌鐵路站→大嶼山巴士11／11A→石壁水塘口落車)
終點 (昂平坐大嶼山巴士23→東涌市中心)
起點 (東涌鐵路站→大嶼山巴士11／11A→石壁水塘口落車)
終點 (昂平坐大嶼山巴士23→東涌市中心)
難度：
4星(5星滿) 長度約7公里，需時6-7小時
4星(5星滿) 長度約7公里，需時6-7小時
路徑特點：
初段一公里好輕鬆，見到石上寫住西狗牙三個字，就開始無止景的爬石，一直攀升至800米，好多路超窄兼兩邊係懸崖，畏高者謹入，基本上得一條路，沿路都有絲帶，上到頂風景開揚，有種大地在我腳下的感覺
裝備：
手套手套手套!! 好重要所以講三次，波鞋，電筒，行動電源，電話，GoPro，毛巾，水每人1.5公升（有一支係全冰），刀仔(食橙用)，2個橙，冰菠蘿八片，面包一個，飯團三個(今次都知要行好耐，好驚唔夠野食)，個人物品。
手套手套手套!! 好重要所以講三次，波鞋，電筒，行動電源，電話，GoPro，毛巾，水每人1.5公升（有一支係全冰），刀仔(食橙用)，2個橙，冰菠蘿八片，面包一個，飯團三個(今次都知要行好耐，好驚唔夠野食)，個人物品。
路線圖：(用Apps實測的路線)
高度圖：
今次真係好好好興奮，因為好耐無合體嘅荒山girl終於出動啦，今次行狗牙嶺係因為朋友想去南天門，結果最後都係行左另一邊，無去到，哈哈，不過有時行山，就係行錯下路，咁先會有啲樂趣架嘛
原定9點東涌出發，hea下hea下10點先出發，雖然我一早6點幾已經食左早餐，不過都係受唔住誘惑食左個subway 買完包後行去東薈城後面嘅巴士站搭車。
其實本身係想經水口村落車行上去，巴士有11號 往大澳／11A號 往石壁(11A只在假日服務)，上左巴士都見到唔少行山人士，諗住都應該有人會喺水口村落，點知結果無人落車，誤打誤撞就跟人喺石壁警崗站落車（對於我地呢啲無咩經驗嘅人嚟講，跟人實無死）。
 |
| 由石壁水塘看著狗牙嶺 |
由於太耐無行山啦，開頭係咁上樓梯已經“扯晒蝦”（很喘），好彩上左一輪樓梯之後，無幾耐路段開始平坦，本來打算喺到達C1509標記柱前面20米嘅小路上一線生機，不過見到前面班人行大路，我哋都係跟住行大路穩陣啲。如果唔係好可能又要鏟林。
 |
| 開始不久就出現的「長命斜」 |
行左1.5公里左右，見到左方對面一個山頭上面有一班人喺懸崖攀石，心諗....唔通我哋都要咁爬？但眼見條又唔似係行去嗰邊，所以無為意繼續行，點知.....
結果越行越唔對路，直至行到去一處好空曠嘅位置，成村人（十幾個人）停晒喺度，旁邊的石頭上面大大隻白色字寫住“西狗牙”，原來呢度就係狗牙嶺嘅起點。
有個阿伯（似係好有經驗）仲大聲講，呢度係架啦，上去啦，上去啦！我當時仲好天真咁以為，爬左呢個山頭就到.....於是雄心壯志咁爬上去，如果要我形容呢段路，我會話係垂直90度嘅“路”，只係有好多突出嚟嘅石頭俾我們做踏腳同扶手...
 |
| 有圖為證，兩步距離已經相差了一個人的身高 |
由於個阿伯係咁叫我哋上先，所以喺群眾壓力之下都係上左去，但係後面成棚人喺咁爬喺咁爬，好似某部喪屍片咁XDDDD 所以本住荒山girl "hea"嘅忠旨，決定喺斜到爆嘅路中間停低，俾其他人行先！順便影下相
 |
| 「喪屍」逼得太緊！ |
 |
| 回望石壁水塘 |
 |
| 朋友見到前面的路都 '無眼睇'...... |
嘩！當下真係成個人都灰晒，不過見到前面班人已經上緊去，當然唔可以放棄啦，而且諗起如果掉頭走，要90度咁“行”返落去，係絕望！所以頂硬上啦~~
 |
| 戴住粉紅手套嘅我，被朋友戲稱為公主，哈哈，睇返啲相又真係幾.... |
不過戴手套真係好有用呀，因為狗牙嶺大部分路段都需要手腳並用攀爬，有啲石頭好“鞋”兼拮手，如果無手套的話，可以準備同自已嘅手皮講定Bye Bye啦~~
當然如果你係行山高手，手套是多餘嘅，嗰日咁岩就遇到一個隱世高手叔叔，佢地一行十幾人，個叔叔負責留後，因為我地跟大隊，路上同叔叔係咁過招數俾我地。
講過左咩招數之前，先講下個叔叔真係好堅啾，因為我地全部人要手腳先爬到嘅路，叔叔就好似行樓梯咁“行”上去，扶都唔駛扶，手套自然變成無用之物，真心勁
叔叔見我地都好似爬得幾辛苦（其實唔係好似，直頭係啦），於是叫我地綁實對鞋，貼腳點就會省力點，然後又叫我地盡量唔好摀低身爬，因為會好費力。而且叔叔已經走到好前面，都不時留意下我地去到邊，好窩心❤
 |
| 圖中啡色衫就係窩心叔叔 |
喺言談之中，叔叔話佢由六歲行山行到而家六十幾歲，下！六十幾歲，我地三個同時間話無可能六十幾，因為叔叔望落去真係好後生，頂多五十幾，所以話有做運動同無做運動，老左就知架啦Hehe
除左路段難行之外，高度都係呢次行程最大嘅挑戰，因為我有啲畏高，所以過左大約500米高度之後，好多路段都係中間得返條小路，兩邊係超斜山坡（喺我眼中直情係懸崖...）真心係會腳軟 係咁請朋友“參扶”，配合返呢日公主嘅造型XD
 |
| 後面最高的點就是鳳凰山頂 |
之前提到帶左好多野食，果然係無錯嘅!因為俾太陽曬住，爬石消耗左好多體力，水份流失得勁快，除左飲水同寶礦力之外，一路上都食冰菠蘿同橙補水，而呢啲食物都成為我地嘅動力，因為每次就到頂嘅時候，就話，不如行左上去先食啦，咁又一條氣上到去再食野。
行下行下，唔經唔覺終於到左狗牙嶺最出名嘅景點“一線生機”，因為一線生機個影相位要特登爬出懸崖出面，加上當時有一班好興奮嘅“外藉姐姐”影緊相，所以我地休息左陣，好快又起行，向最後兩個山頭進發（當時唔知係最後兩個架）。
不過喺攻頂前，首先又要克服我嘅畏高....
 |
| 回望爬過的山頭，有點感動... |
不過喺攻頂前，首先又要克服我嘅畏高....
因為過左一線生機，先落一段路，第一個 石罅位有成個人咁高，隻腳伸到最長最盡都掂唔到腳踏位，朋友叫呢個位做“腳短濕滯位” 因為腳短真係完全掂唔到.....
 |
| 腳短濕滯位，就係朋友落緊去的那個位置。 兩邊很斜，睇見都滴汗... |
腳軟完一輪之後，吸一口氣，又再向上爬，不過今次就係俾“進擊的姐姐”追擊，一路喺後面緊貼住我地，行最後嘅我頂唔住了，轉身同姐姐講，“You go first. ”點知姐姐開頭仲拒絕我，但又一路貼住我後面，同我講加油（其實加油背後應該係想叫我爬快啲啦，慢吞吞），結果都係停低，俾嗰八位進擊姐姐行先，咁先鬆左一口氣。
至於點解叫“進擊的姐姐”，因為佢地真係情緒非常高漲，一路爬一路唱歌，又好大聲咁叫對方做BB，又好敢爬出去懸崖嘅石頭上，擺出各種pose影相，總之就好開心啦，連我地都被感染到啦。
而另外一件令我印象難忘嘅，就係接近這次旅程最高點斬柴坳嘅最後100米，因為呢段路一樣係浮沙碎石，不過非常空曠，一啲安全感都無（對我嚟講），所以幾乎呢段都係好似成隻狗咁爬上去T.T
下午五點半左右，終於到了人稱“小鳥回頭石”嘅位置，呢個位置幾乎係遊人嘅打卡位，不過太多人啦，大家都排隊影相，所以我哋無停低，直衝去前方30米嘅斬柴坳。
 |
| 終於爬到斬柴坳啦!!!!!! |
斬柴坳係一個分叉路口位，標高810米，落樓梯位係去昂坪天壇大佛，路牌寫半個鐘到（應該係以跑落去嘅速度計...）,另一面上樓梯就係前往鳳凰山頂，樓梯算完整，不過喺山脊上面（睇見到腳軟）
幾經辛苦終於上到810米嘅斬柴坳，呢個位超級大風，同山腳完全兩個氣候，吹到頭都甩，雖然都好想攻埋上鳳凰山頂，不過天色漸暗，加上冬天早入黑，所以三條友搵個地方，食埋我背囊入面嗰三個飯團，就準備落返去昂坪了。
食完野起身揹返個袋，咦？點解輕左咁多嘅？？原來成個背囊除左水，最重竟然係嗰三個飯團（驚!!!）早知食左飯團先啦....
雖然落山前個背囊先輕左，不過都好大幫忙啊，因為落嘅石級雖然算整齊，不過級級都幾高，又再一次腳軟，而且加埋腳震（因為太攰），都驚驚地.....
 |
| 扮文青影相位推介 (斬柴坳路牌對落幾級) |
落左唔知幾多百級之後，終於嚟到心經簡林，呢個時間個天已經差唔多黑齊，心經簡林又係一個有好多條分叉路嘅位置，眼見有一班年輕人想穿過心經簡林行去大佛，但係之前喺山頂睇似係行好遠，而且地圖有另一條短好多嘅路，加上有個牌寫住“往巴士站”，於是今次信自己！
 |
| 心經簡林 |
沿水泥路行10分鐘左右，18：20左右就到了大佛底下嘅廣場了！咁就結束左今日嘅旅程啦！而且有個人係咁叫我地快啲去巴士站趕18：30車，不過我哋太hea啦，最後都係上左下一班19：10嘅車返東涌市中心，哈哈
後記：大佛下有個洗手間，行完岩岩好可以洗個手洗個面換件衫，夜晚嘅大佛特別寧靜，當我哋以為全部舖頭都關左門嘅時候，竟然豆腐花店未收！當下梗係即衝入去叫返碗薑汁豆花啦，不過成$15一碗，物價真係貴左好多啊T.T
 |
| 吃完豆花有狗狗在門口恭送客人 |
留言
張貼留言